أصدرت شركة ابل 3 أصدارات جديدة وهيiPhone XS و iPhone XS Max و iPhone XR .. جائت الهواتف بتصميم مكرر ولكن البروسيسور هو البطل الحكاية!
نبدأ مع الموبايلين التُقال آيفون XS وXS Max الاختلاف بينهم في الشاشة والبطارية، غير كدا نسخة طبق الأصل من بعض!
الآيفون XS جاي بشاشة 5.8 بوصة من نوع Super Retina OLED بدقة وضوح 2436*1125 بيكسل، هي شاشة الآيفون اكس بتاع السنة اللي فاتت!
أما الآيفون XS Max فشاشته عملاقة 6.5 بوصة، يعني أكبر حتى من النوت 9 أبو 6.4 بوصة، ودقة وضوحه 2688*1242 بيكسل وبرضو Super Retina OLED !
الاتنين معدل توزيع البيكسلات 458 بيكسل في البوصة الواحدة!
الموبايلين شغالين ببروسيسور أبل الجديد A12 Bionic واللي بيقدم:
1. أداء اسرع 15% وبيوفر عمر بطارية 40% مقارنة بـ A11 Bionic
2. 6 أنوية، منهم نواتين مخصوص للمهمات التقيلة في معالجة البيانات
3. 4 أنوية مخصوصة لمعالجة الجرافيكس بحيث المهمة تتعمل أسرع 50% عن آيفون اكس
4. فيه بروسيسور خاص بتعليم الآلة مكون من 8 أنوية وده بيخليك تقدر تنجز مهمات أسرع لدرجة انك تقدر تفتح الأبلكيشنز أسرع 30% عن آيفون اكس
5. بروسيسور مخصوص لمعالجة الصور وده بيساعد الكاميرا انها تقدر تحدد ملامح وش اللي بيتصور بدقة عالية وكمان تحسن من صور البورتريه بحيث انك تقدر تتحكم بدقة عالية في درجة تمويه خلفية اللي بيتصور ويبقى الفوكس كله عليه بعد ما تتلقط الصورة أصلا !
الموبايلين بيقدموا خيارات تخزين داخلي 64 جيجابايت و256 جيجابايت و512 جيجابايت!
تجربة التصوير من الحاجات المميزة جدا السنة دي في موبايلات آيفون،
على مستوى الكاميرا الخلفية فهي جاية مزدوجة زي السنة اللي فاتت 12 ميجابكسل العدستين، بس واحدة فيهم مخصوصة للتصوير بزاوية واسعة ودي اتساعها f/1.7 أما التانية فمخصوصة للزووم بفتحة عدسة f/2.4!
فيه ميزة جديدة اسمها Smart HDR ودي بقى معتمدة على ان الكاميرا بتلقط لقطات كتيرة للظل والنور بحيث ان بروسيسور الصور ياخد أفضل لقطات منها ويحطها في الصورة بحيث تخرج بشكل متوازن من حيث الإضاءة!
أما السيلفي فهي 7 ميجابكسل باتساع f/2.2 !
بطارية الموبايلات الفرق بينهم وبين بعض ان الـ XS بتديك 30 دقيقة زيادة عن الآيفون اكس، أما الماكس بيديك 90 دقيقة زيادة.. يعني فرق ساعة!
السعر هو ال مبالغ فيه جدا!
الآيفون XS بيبدأ من 999 دولار
الآيفون XS Max بيبدأ من 1099 دولار
الآيفون Xr الإصدار الارخص 750 دولار
